1 2 3
4 5 6 7

សភា​បង្កើត​ក្រុម​តាក់តែង​ច្បាប់​គ្រប់​គ្រង​ផ្ទះ​ជួល

20150302_08

អគារ​បន្ទប់​ជួល​មួយ​របស់​កម្មករ​រោងចក្រ​កាត់​ដេរ នៅ​ក្នុង​រាជធានី​ភ្នំពេញ។ ផា លីណា

ភ្នំពេញៈ រដ្ឋសភា បាន​បង្កើត​ក្រុម​ការងារ​មួយ​ដើម្បី​រៀបចំ​តាក់​តែង​សេចក្តី​ស្នើ​ច្បាប់ ស្តីពី​ភតិសន្យា​ពិសេស ឬ​កិច្ច​សន្យា​ជួល​ផ្ទះ សម្រាប់​វិស័យ​សង្គមកិច្ច ដែល​ច្បាប់​នេះ​នឹង​ធានា​ដល់​ផល​ប្រយោជន៍​រវាង​ម្ចាស់​ផ្ទះ​និង​អ្នក​ជួល ព្រម​ទាំង​បញ្ចៀស​នូវ​ការ​ដំឡើង​ថ្លៃ​ជួល​ផ្ទះ​ផង។

យោង​តាម​សេចក្តី​សម្រេច​ចុះ​ថ្ងៃ​សៅរ៍ របស់​ប្រធាន​ថ្នាក់​ដឹកនាំ​តំណាង​រាស្រ្ត​គណបក្ស​ប្រជាជន​កម្ពុជា លោក ស ខេង និង​ប្រធាន​តំណាង​រាស្រ្ត​គណបក្ស​សង្គ្រោះ​ជាតិ លោក សម រង្ស៊ី បាន​ឲ្យ​ដឹង​ថា ក្រុម​ការងារ​នេះ​មាន​សមាស​ភាព ៨​រូប ក្នុង​នោះ ៤​រូប មក​ពី​គណបក្ស​ប្រជាជន​កម្ពុជា និង ៤ រូប​ទៀត មក​ពី​គណបក្ស​សង្គ្រោះ​ជាតិ រួម​មាន លោក ប៉ែន បញ្ញា ជា​ប្រធាន លោក អ៊ូ ច័ន្ទ​ឫទ្ធិ អនុ​ប្រធាន លោក​ស្រី កែ សុវណ្ណ​រតន៍ លោក ប៉ាល់ សំអឿន លោក ម៉ៅ មុនី​វណ្ណ លោក​ស្រី កែ ច័ន្ទមុនី និង​លោក យី វណ្ណ​ដេត ជា​សមាជិក។ ក្រុម​ការងារ​នេះ​មាន​ភារកិច្ច​ពិនិត្យ សិក្សា និង​រៀបចំ​តាក់​តែង​សេចក្តី​ស្នើ​ច្បាប់​ស្តី​ពី​ភតិសន្យា​ពិសេស ឬ​ការ​គ្រប់​គ្រង​ជួល​ផ្ទះ​សម្រាប់​វិស័យ​សង្គម​កិច្ច សម្រាប់​ដាក់​ជូន​ថ្នាក់​ដឹក​នាំ​តំណាង​រាស្រ្ត​ពិនិត្យ​និង​សម្រេច។

អនុ​ប្រធាន​ក្រុម​ការងារ​តាក់​តែង​សេចក្តី​ស្នើ​ច្បាប់​មក​ពី​គណបក្ស​សង្គ្រោះ​ជាតិ លោក អ៊ូ ច័ន្ទឫទ្ធិ មាន​ប្រសាសន៍​កាល​ពី​ថ្ងៃ​ម្សិល​មិញ​ថា ក្រុម​ការងារ​ថ្មី​នេះ នឹង​ចាប់​ផ្តើម​ជួប​គ្នា​ជា​លើក​ដំបូង​នៅ​ក្នុង​សប្តាហ៍​នេះ ដើម្បី​ពិភាក្សា​គ្នា​ទៅ​លើ​កិច្ច​សន្យា​ជួល​ផ្ទះ​និង​លក្ខខណ្ឌ​ផ្សេងៗ។

លោក​ថ្លែង​ថា៖ «គម្រោង​នៃ​ការ​ធ្វើ​ច្បាប់​នេះ គឺ​ពាក់​ព័ន្ធ​នឹង​ការ​ជួល​ផ្ទះ​ស្នាក់​នៅ​និង​ការ​ជួល​ផ្ទះ​សម្រាប់​ធ្វើ​អាជីវកម្ម​ខ្នាត​តូច ហើយ​យើង​ក៏​អាច​កំណត់​ពី​តម្លៃ ការពារ​មិន​ឲ្យ​ឡើង​ថ្លៃ​ជួល​ផ្ទះ ហើយ​ថា តើ​ផ្ទះ​ហ្នឹង​ស្អាត​បាត មាន​អនាម័យ​ត្រឹម​ត្រូវ​ដែល​អាច​រស់​នៅ​បាន​អត់? អ៊ីចឹង​ច្បាប់​ហ្នឹង​ការពារ​ទាំង​ម្ចាស់​ផ្ទះ និង​ទាំង​អ្នក​ជួល»។

ចំណែក លោក ប៉ាល់ សំអឿន សមាជិក​ក្រុម​ការងារ​មក​ពី​គណបក្ស​ប្រជាជន​កម្ពុជា បាន​បន្ថែម​ថា៖ «ជំហាន​ដំបូង គឺ​ការ​បង្កើត​ក្រុម​ការងារ​ជា​មុន​សិន ហើយ​បន្ទាប់​មក​យើង​កំណត់​ថ្ងៃ​ជួប​គ្នា​ក្នុង​សប្តាហ៍ ទី១ នៃ ខែ​មីនា នេះ ដើម្បី​ដាក់​ជា​វិធានការ​ឬ​គោល​ការណ៍​យ៉ាង​ណា​នោះគឺ​អាស្រ័យ​លើ​ការ​ជជែក​គ្នា»។

ការ​បង្កើត​ក្រុម​ការងារ​តាក់​តែង​សេចក្តី​ស្នើ​ច្បាប់​ភតិសន្យា​ពិសេស​នេះ បាន​ធ្វើ​ឡើង​បន្ទាប់​ពី​លោក​នាយក​រដ្ឋ​មន្រ្តី ហ៊ុន សែន បាន​ប្រកាស​កាល​ពី​ថ្ងៃ ទី១០ ខែ​កុម្ភៈ ថា លោក​និង​លោក សម រង្ស៊ី ប្រធាន​គណបក្ស​សង្គ្រោះ​ជាតិ បាន​ឯកភាព​គ្នា​ពី​ការ​បង្កើត​ច្បាប់​មួយ​គ្រប់​គ្រង​លើ​ថ្លៃ​ជួល​ផ្ទះ ដែល​កើន​ឡើង​យ៉ាង​ខ្លាំង ចាប់​តាំង​ពី​ប្រាក់​ឈ្នួល​អប្បបរមា​ប្រចាំ​ខែ​ក្នុង​វិស័យ​កាត់​ដេរ​ត្រូវ​បាន​ដំឡើង​ដល់ ១២៨ ដុល្លារ ក្នុង​មួយ​ខែ។ ផែនការ​នេះ ក៏​នឹង​ត្រូវ​អនុវត្ត​ចំពោះ​និស្សិត​ក្រីក្រ​ផង​ដែរ។ ប្រសិន​បើ​ច្បាប់​នេះ​ចេញ​ជា​ផ្លែ​ផ្កា មន្ត្រី​សហជីព បាន​ថ្លែង​ថា វា​ជា​ជំហាន​វិជ្ជមាន​របស់​រដ្ឋាភិបាល​និង​គណបក្ស​ប្រឆាំង ក្នុង​ការ​ជួយ​កម្មករ​កាត់​ដេរ​ឲ្យ​ទទួល​បាន​ប្រាក់​ឈ្នួល​សមរម្យ អាច​ឲ្យ​ពួកគេ​រស់​នៅ​បាន។

លោក អាត់ ធន់ ប្រធាន​សហជីព​ស៊ីខៅឌូ យល់​ថា កម្មករ​ភាគ​ច្រើន​បង់​ប្រាក់​ពី ២០ ទៅ ៥០ ដុល្លារ សម្រាប់​ថ្លៃ​បន្ទប់​ជួល​គ្មាន​ស្តង់ដារ ដែល​ស្នាក់​នៅ​ពី ៣ ទៅ ៥ នាក់ ខណៈ​អ្នក​ខ្លះ​ដែល​រស់​នៅ​តំបន់​ទីក្រុង ដូច​ជា​ភ្នំពេញ ពេល​ខ្លះ ត្រូវ​បង្ខំ​ចិត្ត​បង់​ប្រាក់​រហូត​ដល់ ១០០ ដុល្លារ​ក្នុង​មួយ​ខែ។

លោក​លើក​ឡើង​ថា៖ «យើង​គាំទ្រ​សេចក្តី​ព្រាង​ច្បាប់​នេះ ប៉ុន្តែ​យើង​សង្ឃឹម​ថា វា​មិន​ត្រឹម​តែ​គ្រប់​គ្រង​លើ​ថ្លៃ​ឈ្នួល​ទេ ព្រោះ​មាន​ការ​ផ្លាស់​ប្តូរ​ច្រើន​ថែម​ទៀត ដែល​ត្រូវ​ធ្វើ​សម្រាប់​កម្មករ ដូច​ជា បង្កើន​ទំហំ​បន្ទប់​និង​ធ្វើ​ឲ្យ​មាន​បរិស្ថាន​នៅ​ទី​កន្លែង​ពួកគេ​រស់​នៅ​កាន់​តែ​ប្រសើរ​ឡើង»។

គួរ​បញ្ជាក់​ថា គម្រោង​បង្កើត​ច្បាប់​នេះ ធ្វើ​ឡើង​បន្ទាប់​ពីមាន​ការ​រអ៊ូ​រទាំ ពី​កម្មករ​-កម្មការិនី ថា ម្ចាស់​ផ្ទះ​ជួល​មួយ​ចំនួន បាន​ដំឡើង​ថ្លៃ​ឈ្នួល​ពី ៥ ទៅ ១០ ដុល្លារ ខណៈ​ដែល​ប្រាក់​ខែ​កម្មករ​ត្រូវ​បាន​ដំឡើង​នា​ពេល​ថ្មីៗ​នេះ។

លោក​នាយក​រដ្ឋ​មន្ត្រី ហ៊ុន សែន ធ្លាប់​ប្រកាស​ឲ្យ​ដឹង​ថា កម្មករ​ដែល​បាន​ជួល​ផ្ទះ​ដើម្បី​ស្នាក់នៅ​ក្នុង​ពេល​បំពេញ​ការងារ​ក្នុង​វិស័យ​កាត់ដេរ មាន​ប្រមាណ​ជា ១៥ ម៉ឺន​នាក់ ខណៈ​អ្នក​ជួល​ចំនួន ៣ ម៉ឺន​បន្ទប់ កំពុង​ទទួល​ការ​បំពាក់​កុងទ័រ​ភ្លើង​ថ្មី ដើម្បី​កុំ​ឲ្យ​ម្ចាស់​ផ្ទះ​ជួល​យក​ថ្លៃ​អគ្គិសនី​ខ្ពស់​ពី​កម្មករ​ឬ​អ្នក​ជួល​ផ្ទះ៕

ប្រភព៖ postkhmer

© 2018 Khmer Famous. All rights reserved. · Entries RSS · Comments RSS